रञ्जिताको शुभकामना : महाधिवेशनले एकीकृत समाजवादीलाई नयाँ युगमा लैजाओस्

काठमाडौं- नागरिक उन्मुक्ति पार्टीकी अध्यक्ष रञ्जिता श्रेष्ठले अहिले संविधान रक्षा गर्दै देश विकासमा अघि बढ्नुपर्ने बताएकी छन् ।नेकपा एकीकृत समाजवादीको आइतबार प्रज्ञा भवनमा सुरु दशौँ राष्ट्रिय महाधिवेशन उद्घाटन समारोहलाई सम्बोधन गर्दै उनले यस्तो भनेकी हुन्।‘पार्टीको महाधिवेशन सफलताको शुभकामना व्यक्त गर्दछु । अब हामीले संविधान निर्माण र त्यसको कार्यान्वयन र रक्षा गर्दै समग्र राष्ट्रको विकाससँग नागरिकका हकहितका लागि दशकौँदेखि गर्दै आएको संघर्षलाई हामी उच्च सम्मान गर्छौं’, उनले भनिन्, ‘दलहरूले जनताको समस्या र आकांक्षालाई सम्बोधन गर्दै देशलाई समृद्धि र स्थायित्वको मार्गमा डोर्‍याउन सक्नुपर्छ ।’उनले जातीय विभेदलाई अन्त्य गर्दै भ्रष्टाचाररहित समाज बनाउनुपर्ने बताइन् । ‘पहिचानको आधारमा दिगो विकासको सिद्धान्त बोकेर हामी हिँडिरहेका छौं। यो महाधिवेशनले एकीकृत समाजवादीलाई अझ सशक्त र एकताबद्ध गरोस्’, उनले भनिन्, ‘नयाँ नीति रणनीति र कार्यक्रमको मस्यौदा तयार गर्न अवसर प्रदान गर्ने विश्वास लिएकी छु। महाधिवेशनले पार्टीका सदस्यहरूलाई नयाँ युगमा प्रवेश गराउने विश्वास हामीले लिएका छौँ ।’