चलचित्र ‘रंगी’ को ‘छ भने माया’ गीत आज सार्वजनिक

अमीर के.सी ,काठमाडौँ:चलचित्र ‘रंगी’ को नयाँ गीत ‘छ भने माया’ आज काठमाडौँको रञ्जना हलमा आयोजित एक औपचारिक कार्यक्रममार्फत सार्वजनिक गरियो। दुर्गेश थापाको शब्द, संगीत, र एरेन्जमेन्टमा तयार गरिएको यस गीतमा आनन्द कार्की र सुजता केसीले स्वर दिएका छन्। गीतलाई ओएसआर डिजिटल प्लेटफर्ममार्फत रिलिज गरिएको छ।

सान्भी इन्टरटेनमेन्टको ब्यानरमा निर्माण भएको यो चलचित्रको निर्देशन सुरेश न्यौपानेले गरेका हुन्। बाबु-छोरीको सम्बन्धमा आधारित यस फिल्ममा मिस वर्ल्ड नेपाल २०२० की विजेता नम्रता श्रेष्ठलाई ‘छ भने माया’ गीतमा उत्कृष्ट रूपमा प्रस्तुत गरिएको छ। उनीसँगै सलोन बस्नेत, दिलीप रायमाझी, आयुषी ढकाल, उत्तम केसी, सुमिन गुरुङ, र विशाल पहारी मुख्य भूमिकामा देखिनेछन्।

यसअघि चलचित्रको टाइटल पोस्टर सार्वजनिक गरिएको थियो, जसले बाबु-छोरीको भावनात्मक कथालाई चित्रण गर्ने संकेत दिएको छ। चलचित्रको निर्माण सक्षम सुवेदीले गरेका हुन् भने लेखन सुमन गजमेरको रहेको छ। सौरभ लामाले छायांकनको जिम्मेवारी सम्हालेका छन्।

दुर्गेश थापा, जो यसअघि ‘छ माया छपक्कै’ र ‘ह्रस्वदीर्घ’ जस्ता चलचित्रका गीतमा आफ्नो कला प्रस्तुत गरिसकेका छन्, ‘छ नि माया’ मार्फत पुनः दर्शकहरूको मन जित्ने प्रयासमा छन्।

‘रंगी’ आगामी फागुन २ गते (फेब्रुअरी १४) प्रदर्शनमा आउनेछ। चलचित्रले पारिवारिक भावना र सम्बन्धको कथा प्रस्तुत गर्ने अपेक्षा गरिएको छ। चलचित्र ‘रंगी’ र यसका गीतहरूको सफलताको लागि शुभकामना।